دكتۆر ئاسۆ فەرەیدوون، پارێزگاری سلێمانی بۆ كەمكردنەوەی رۆتین و ئاسانكاری بۆ هاووڵاتیان و چاودێری كردنی باشتری بازارەكان ژمارەیەك رێنمای نوێ پەسەند دەكات بۆ پێدانی مۆڵەت بە پیشەوەرەكان و فرۆشگاكانی سەوزەو میوە لە عەلوەی سلێمانی و شارو شارۆچەكان.
بەپێی رێنماییەكان پەسەندكراوەكان، بۆ پێدانی مۆڵەتی پیشەی بۆ ئەو پیشانەی هیچ تایبەتمەند نییە بە دەسەڵاتی هیچ فەرمانگەیەكی دیكە، پێویستە خاوەن پیشە یان دوكاندار داواكاری پێشكەشی قائیمقامیەت بكات و بروانامەی ئەستۆپاكی و باجی دەرامەت هاوپێچ بكات و دواتر داواكار رەزامەندی ئاسایشی سلێمانی یان ناوچەكەی و بەرێوەبەرایەتی بەرگری شارستانی و بەرێوەبەرایەتی خۆپاراستنی تەندروستی وەربگرێت.
هەر بەپێی رێنماییەكان بۆ هەموو پیشەكان دەبێت رەزامەندی لایەنی پەیوەندیداری پیشەكە وەربگیرێـت.
لە رێنمایە پەسەندكراوەكاندا هاتووە، مۆڵەت بۆ ماوەی 2 ساڵ دەدرێت و پێویستە دوای 2 ساڵەكە مۆڵەتەكە تازە بكرێتەوە.
سەبارەت بە رێنماییەكانی فرۆشگاكانی سەوزەو میوە لە عەلوەكان، بەهەمان شێوە دەبێت خاوەنی فرۆشگە داواكاری پێشكەشی قائیمقامیەت بكات و ئەستۆپاكی باجی دەرامەت هاوپیچ بكات و دواتر رەزامەندی بەرێوەبەرایەتی كشتوكاڵ و ئاسایش و بەرگری شارستانی و خۆپاراستنی تەندروستی وەربگرێت.
هەروەك پێویستە داواكار مۆڵەت چەند مەرج و رێنمایەك جێ بەجێ بكات كە بریتین لە:
یەكەم: خاوەنی فرۆشگا بێت لە عەلوەكان و رووبەری فرۆشگاكەشی 126 مەتر دووجا بێت ناوی بازرگانی نوسینگەو ژمارەیەكەی و ژمارەی تەلەفون لەسەر تابلۆی نوسینگەكەی هەبێت.
دووەم: پێویستە خاوەن فرۆشگا بەرادی ساردكەرەوەی هەبێت بۆ پاراستنی سەوزەو میوە.
هەروەها پێویستە خاوەن فرۆشگا رێنماییەكانی هۆبەی كشتوكاڵی ناو عەلوەكان جێ بەجێ بكات كە بریتین لە: بەرهەمی خراپ و بەسەرچوو نەفرۆشێت، نرخ هەڵبواسێت، پابەندی ئەو نرخانە بێت كە لەلایەن لیژنەی نرخ دانانەوە دادەنرێت و رۆژانە ئامادە بێت بۆ هەر جۆرە پشكنینێك كە لەلایەن لیژنە هاوبەشەكانی قائیمقامییەت و لیژنەی چاودێری گومرگی عەلوە یان هەر لیژنەیەكی تر ئەنجام دەدرێت.
هەروەك پێویستە لەسەر خاوەن فرۆشگەكانی ناو عەلوەكان تەنیا سەوزەو میوە بفرۆشن و بەروبوومەكانی وەشكەو كەلوپەلی تر .
هەر لەرێنماییەكانی فرۆشگەكانی میوەو سەوزە بۆ عەلوەكان هاتووە، كە دەبێت فرۆشیار پابەند بێت بە لیستی قەدەغەكراوەكانی وەزارەتی كشتوكاڵ و مامەڵە نەكردن بە بەروبوومی قاچاخ
بەپێی رێنماییەكانیش ، مۆڵەت بۆ ماوەی دوو ساڵ دەدرێت و پاشان دەبێت تازە بكرێتەوە.
Kurdish