سکرتێری ناوه‌ندی په‌ره‌پێدانی په‌یوه‌ندییه ئابورییه‌کانی ئێران له گه‌ڵ عێراق و سوریا وتی له 9 مانگی ڕابردووی ئه‌مساڵی کۆچی هه‌تاوی ڕێژه‌ی هه‌نارده‌ی کاڵا له ئێرانه‌وه بۆ عێراق له سه‌دا 40 زیادی کردووه.
حه‌سه‌ن دانایی فه‌ڕ له شاری سنه ڕایگه‌یاند: عێراق و سوریا دوو وڵاتن که به‌ره‌و قۆناغی ئاوه‌دانکردنه‌وه ده‌ڕۆن، عێراق ته‌نیا پێویستی به 300 ملیار دۆلار بودجه‌ی ئاوه‌دانکردنه‌وه هه‌یه.
ناوبراو وتی: عێراق وڵاتێکی ده‌وڵه‌مه‌نده و ڕۆژانه زیاتر له 3 ملیۆن و 500 هه‌زار به‌رمیل نه‌وت هه‌نارده ده‌کات و داهاتێکی زۆر باشی هه‌یه، بودجه‌ی 2019 ی ئه‌م وڵاته 105 ملیار دۆلاره که ڕێژه‌یه‌کی به‌رچاوه.
ڕاوێژکاری جێگری یه‌که‌می سه‌رۆک کۆماری ئیسلامی ئێران وتی: له سه‌دا 30 ی بودجه‌ی 2019 ی عێراق په‌یوه‌ندی به پرۆژه‌کانی تایبه‌ت به خزمه‌تگوزاری ته‌کنیکی – ئه‌ندازیارییه‌وه هه‌یه و ئه‌مه‌ش ده‌توانێت ڕۆڵی له سه‌رکه‌وتنی کۆمپانیا ئێرانییه‌کاندا هه‌بێت.
دانایی فه‌ڕ له درێژه‌دا وتی: تا ساڵی 2012 له سه‌دا 75 ی تواناکانی ئێمه له به‌شی ته‌کنیکی و ئه‌ندازیاری ڕه‌وانه‌ی عێراق ده‌کرا و پرۆژه‌کانی که‌رتی حکومی و تایبه‌تی ئێران له‌م وڵاته گه‌یشته 4 ملیار و 400 ملیۆن دۆلار، به‌ڵام له پاش دابه‌زینی نرخی نه‌وت و قه‌یرانی داعش ئه‌و کۆمپانیانه‌ی که له عێراق چالاکییان ده‌کرد تووشی کێشه و گرفت بوون و هێشتا کێشه‌کانی ئه‌وان چاره‌سه‌ر نه‌کراوه.
سکرتێری ناوه‌ندی په‌ره‌پێدانی په‌یوه‌ندییه ئابورییه‌کانی ئێران له گه‌ڵ عێراق و سوریا به ئاماژه به دراوسێبوونی پارێزگای کوردستان له گه‌ڵ هه‌رێمی کوردستانی عێراق وتی: دراوسێبوون، زمان و که‌لتوری هاوبه‌ش ده‌توانێت ڕۆڵی گرنگی له په‌یوه‌ندییه ئابوری و بازرگانییه‌کان پارێزگای کوردستان و هه‌رێمدا هه‌بێت و ئێمه پێشوازی له به‌ره‌وپێشچوونی په‌یوه‌ندییه‌کان ده‌که‌ین.
حه‌سه‌ن دانایی فه‌ڕ ڕایگه‌یاند: له بواری ئابوری و بازرگانیدا په‌یوه‌ندییه‌کانی ئێران و عێراق چه‌ندین به‌شی جیاجیا له خۆ ده‌گرێت، له ساڵی ڕابردوو نزیکه‌ی 6 ملیۆن زیاره‌تکار سه‌ردانی هه‌ر دوو وڵاتیان کردووه و ئه‌مه‌ش پیشان ده‌دات که له سه‌دا 72 گه‌شتیارانی بیانی ئێران له وڵاتی عێراقن و له به‌رامبه‌ریشدا له سه‌دا 75 ی گه‌شتیارانی بیانی عێراق ئێرانین و له‌م به‌شه‌دا په‌یوه‌ندییه‌کان له ئاستێکی زۆر به‌رزدان.
ڕاوێژکاری جێگری یه‌که‌می سه‌رۆک کۆماری ئێران وتی: له به‌شی کاڵا له ساڵی ڕابردوو 6 ملیار و 400 ملیۆن دۆلار کاڵا هه‌نارده‌ی عێراق کراوه که ئه‌مساڵ پێش بینی ئه‌وه‌یه ئه‌م ڕێژه‌یه ده‌گاته 8 ملیار و 100 ملیۆن دۆلار تا زیاتر له سه‌دا 35 به‌راورد به ساڵی ڕابردوو به‌رزبوونه‌وه به خۆوه ببینێت.
ناوبراو وه‌بیری هێنایه‌وه: له 9 مانگی ڕابردووی ئه‌مساڵی کۆچی هه‌تاوی هه‌نارده‌ی ئێران بۆ عێراق له سه‌دا 40 به‌رز بووه‌ته‌وه که ئه‌م ڕێژه‌یه به‌راورد به ماوه‌ی هاوشێوه‌ی ساڵی ڕابردووش به‌رچاوه.
وتیشی: له به‌شی وزه‌دا سه‌ره‌ڕای هه‌نارده‌ی ئێستای کاره‌بای ئێران بۆ عێراق له سه‌ردانه‌که‌ی ئه‌م دواییه‌ی وه‌زیری وزه‌ی ئێران بۆ به‌غدا پرسی هه‌نارده‌ی کاره‌با بۆ هه‌رێمی کوردستان تاوتوێ کراوه به‌ڵام له به‌ر ئه‌وه‌ی که له ڕابردوودا حکومه‌تی هه‌رێم سه‌ربه‌خۆ مامه‌ڵه‌ی له‌م بواره‌دا کردووه، وه‌زاره‌تی کاره‌بای عێراق و حکومه‌تی ناوه‌نده‌ی به لایانه‌وه گرنگ نه‌بووه.
حه‌سه‌ن دانایی فه‌ڕ ڕایگه‌یاند: ئێران ئاماده‌یه له ڕێگای هه‌ڵه‌بجه‌وه گاز هه‌نارده‌ی هه‌رێمی کوردستان بکات.
ئه‌م به‌رپرسه‌ی ئێران له کۆتاییدا وتی: په‌یوه‌ندی سیاسی نێوان ئێران و عێراق له ئاستێکی باشدایه و هیچ کێشه‌یه‌کمان له‌م بواره‌دا نییه.
جام کوردی
Kurdish