بڕیارە ئەم هەفتەیە مەرزی نێودەوڵەتی سەیرانبەن لە سنوری هەرێمی كوردستان و ئێران بكرێـتەوە و بەرێوەبەری ناحیەی گەرمك-یش دەڵێت سەرجەم ئامادەكارییەكان بۆ كردنەوەی ئەو مەرزە ئەنجامدراون.
حاكم زیاد عەبدوڵا مستەفا بەڕێوەبەری ناحیەی گەرمك رایگەیاند ” بڕیارە سبەی دووشەممە 1ی شوبات بەسەرپەرشتی پارێزگاری سلێمانی و ئامادەبوونی هەریەك لە كونسوڵی ئێران لەهەرێمی كوردستان و پارێزگاری سنەو قائمقامی بانە، مەرزی نێودەوڵەتی سەیرانبەن لە نێوان هەرێمی كوردستان و كۆماری ئیسلامی ئێران بكرێـتەوە ” .
وتیشی” لە ئێستادا هاوشێوەی مەرزی باشماخ هەموو بەشەكانی ئامادەكراوە و ئەو گرفتانەشی كە هەبوون چارەسەر كراون”.
بەڕێوەبەری ناحیەی گەرمك ئاماژەی بەوەشكرد” لەم مەرزەدا رێگا بە هاتووچۆی هاوڵاتیان و هەروەها بازرگانی نێوان هەردوو وڵات دەدرێـت”.
مەرزی سەیرانبەن 20 كیلۆمەتر لە ناحیەی گەرمك و 40 كیلۆمەتر لە قەزای پێنجوێن-ەوە دوورە و هەرێمی كوردستان بەشاری بانەی رۆژهەڵاتی كوردستان دەگەیەنێت .
سەرچاوە: خەندان
Kurdish