حكومەتی هەرێمی كوردستان و كۆمپانیایەكی بریتانی لەرێكەوتن نزیك دەبنەوە بۆ جێ بەجێ كردنی چەند پرۆژەیەكی ستراتیژی سلێمانی بەشێوەی قەرز و وەزیری شارەوانیش رایدەگەیەنێت هەوڵدەدەن هەندێك پرۆژە گرنگ و خزمەتگوزارییەكان لەرێگەی وەبەرهێنانەوە ئەنجام بدەن.
لە كۆبوونەوە یەكدا كە بەسەرپەرەشتی نەورۆز مەولود وەزیری شارەوانی و گەشتوگوزاری حكومەتی هەرێمی كوردستان و بەهرۆز محەمەد ساڵح پارێزگاری سلێمانی و بە ئامادەبوونی بریكاری وەزیری شارەوانی و بەرێوەبەر و لێپرسراوانی وەزارەتی شارەوانی لەسلێمانی و ستافێك لە بەرێوەبەرە گشتیەكانی دیوانی وەزارەت لە دیوانی پارێزگای سلێمانی بەرێوەچوو،
بە وردی گفتوگۆ كرا لەبارەی ئیش وكارەكانی وەزارەتی شارەوانی لە پارێزگای سلێمانی و ئەو كێشەو گرفتانەی رووبەرووی فەرمانگەكانی ئەو وەزارەتە بوونەتەوە.
لەرووەوە كێشەكانی دابینكردنی ئاوی خواردنەوە و كێشەی زیادەڕەوی و قەرەبووی زەوی و ئەو ئاستەنگانەی یاسا و رێنمایەكان دروستیان كردووەو چەندین بابەتی تر بەوردی خرانە بەر باس.
لە كۆبوونەوەكەدا پارێزگاری سلێمانی پێشنیاری كرد وەبەرهێنان ئاراستەی كەرتە خزمەتگوزارییەكانی وەك دابینكردنی ئاوی خواردنەوەش بكرێت و تەئكیدی كردەوە باشترین رێگەچارە بۆ كەمكردنەوەی كێشەی كەمئاوی و هەندێك خزمەتگوزارییەكانی تر ئاراستەكردنی كەرتی تایبەتە بەرەو وەبەرهێنان لەو كەرتەدا، وەزیری شارەوانیش وێرای پشگیری لە پێشنیارەكە رایگەیاند لەهەوڵدان و بۆچوونیان وایە هەندێك پرۆژە گرنگ و خزمەتگوزارییەكان لەرێگەی وەبەرهێنانەوە یان بەشێوەی قەرزی درێژ خایەن ئەنجام بدەن، بەتایبەت ئەو پرۆژانەی پەیوەندی راستەوخۆیان بە ژیانی هاووڵاتیانەوە هەیە.
هەر لەكۆبوونەوەكەدا پارێزگاری سلێمانی تەئكیدی لە دابەزاندنی دەسەڵاتەكان و زیاتر چەسپاندنی سیستمی لامەركەزی ئیداری كردەوە.
لەبەشێكی تری كۆبوونەوەكەدا راگەیاندرا سەرۆكایەتی ئەنجومەنی وەزیران و وەزارەتی شارەوانی گفتوگۆیان لەگەڵ كۆمپانیای (بای وەتەر)ی بریتانی كردووە بۆ جێ بەجێ كردنی پرۆژەی چارەسەركردن و ریسایكلینی ئاوی قورس(ئاوەڕۆی) سلێمانی و راكێشانی هێڵكی نوێی ئاو لە دوكانەوە بۆ سلێمانی و گفتوگۆكانیش بەرەوپێشچوونیان بەخۆیەوە دیووە و گەیشتوونەتە جۆرێك لە رێكەوتن.
لەبەرامبەردا پارێزگاری سلێمانی ئەوەی بە موژدەیەكی خۆش وەسف كرد.
جێگەی باسە پرۆژەی هێڵی نوێی ئاوی سلێمانی و چارەسەری ئاوی قورسی سلێمانی پێشتر لە لایەن پارێزگای سلێمانییەوە تەواوی پرۆپۆزەڵی ئامادەكراوەو لەگەڵ كۆمپانیای بای وەتەری بریتانی گفتوگۆكراوە بۆ جێ بەجێ كردنی بە شێوەی قەرزی درێژخایەن و پاشان ئاراستەی لە ئەنجومەنی وەزیران كراوە، گرنگی ئەو پرۆژەیە لەوەدایە ئاوی سلێمانی دەكات بە 24 كاتژمێر و پێویستی ماڵان بە تەنكی نامێنێت، هەروەها ئاوی قورسی سلێمانی كە بووتە گرفتێكی ژینگەی چارەسەر دەكات دووبارە بۆ ئاودانی پاركەكان بەكاردێتەوەو بەوەش رێژەی سەوزای زیاد دەبێت.
Kurdish