به‌شی (200) ساڵی توركیا ده‌كات

ئاژانسی ئه‌نادۆڵ بڵاویكرده‌وه‌، ناوچه‌كانی ژێر ده‌سه‌ڵاتی حكومه‌تی هه‌رێمی كوردستان، زیاتر له‌(14) ملیارو (600) ملیۆن تۆن نه‌وتی یه‌ده‌گی هه‌یه‌، ئه‌و ڕێژه‌یه‌ش به‌راورد به‌ڕێژه‌ی وه‌به‌رهێنانی ساڵانه‌ی نه‌وت له‌توركیا كه‌ پێنج ملیۆن‌و (310) هه‌زار تۆنه‌، پێداویستی (200) ساڵی توركیا دابین ده‌كات، جگه‌ له‌وه‌ش نه‌وتی هه‌رێم ده‌توانێت بۆ ماوه‌ی ساڵێك‌و شه‌ش مانگ پێداویستی نه‌وتی جیهان دابین بكات.

چاڵه‌ نه‌وته‌كانی ته‌ق ته‌ق، تاڤگه‌، خورمه‌ڵه‌، شێخان و چه‌ندین ناوچه‌ی دیكه‌، ڕۆژانه‌ زیاتر له‌ (٥٤) هه‌زار تۆن نه‌وتیان لێ به‌رهه‌مده‌هێندرێت، چاوه‌ڕوانیش ده‌كرێت حكومه‌تی هه‌رێمی كوردستان ڕێژه‌ی هه‌نارده‌ی نه‌وتی ڕۆژانه‌ی خۆی تا ساڵی (٢٠١٥) بگه‌یه‌نێته‌ پێنج هه‌زارو (136) هه‌زار تۆن، ئه‌و ڕێژه‌یه‌ش تا ساڵی (٢٠١٩)بگه‌یه‌ندرێته‌ (٢٧٣) هه‌زار تۆن له‌ڕۆژێكدا.

بسپۆڕانیش بواری نه‌وتیش پێیان وایه‌، ڕێگه‌ی سه‌ره‌كی‌و گونجاو بۆ گه‌یاندنی نه‌وتی هه‌رێم‌و عێراق به‌وڵاتانی جیهان، توركیایه‌.

عێراق به‌ بڕی (٢٠) ملیار تۆن نه‌وتی یه‌ده‌گی هه‌یه‌، له‌دوای هه‌ریه‌ك له‌وڵاتانی سعودیه‌، ڤه‌نزوێلا، ئێران‌و كه‌نه‌داوه‌ دێت كه‌ گه‌وره‌ترین وڵاتانی جیهانن بۆ دابینكردنی نه‌وت.

(٦٠%)ی ڕێژه‌ی نه‌وتی عێراقیش له‌به‌سره‌یه‌، به‌گشتی له‌پێنج وێستگه‌دا نه‌وتی عێراق كۆكراوه‌ته‌وه‌.

به‌شێكی زۆر كه‌می نه‌وتی عێراق له‌ناوه‌ڕاستی ئه‌و وڵاته‌دایه‌، (١٧%)ی  له‌ كوردستاندایه‌ كه‌ به‌شی هه‌ره‌ زۆری ئه‌و ڕێژه‌یه‌ له‌كه‌ركوكدایه‌.

هه‌ریه‌كه‌ له‌ئه‌مریكا به‌ڕێژه‌ی (١٩%)، هیندستان به‌ڕێژه‌ی (١٣%) چین به‌ڕێژه‌ی (١٩%) كڕیاری‌ نه‌وتی عێراقن‌و پرۆسه‌ی كڕین‌و فرۆشتنی ئه‌و نه‌وته‌ له‌ڕێگه‌ی به‌نده‌ری به‌سره‌وه‌ ئه‌نجام ده‌درێت.

توركیاش له‌ڕێگه‌ی بۆری نێوان كه‌ركوك – جه‌یهانه‌وه‌، نه‌وتی عێراق ده‌كڕێت، له‌پاڵ ئه‌و بۆرییه‌دا دوو هێڵی دیكه‌ به‌درێژایی هه‌زار كیلۆمه‌تر هه‌یه‌، توانای گواستنه‌وه‌ی زیاتر له‌ (65) ملیۆن به‌رمیل نه‌وتی له‌ڕۆژێكدا هه‌یه‌.

له‌ئێستاشدا هه‌رێمی كوردستان ڕۆژانه‌ (100) هه‌زار به‌رمیل نه‌وت هه‌نارده‌ی توركیا ده‌كات.