وەك لە میدیاكانی عێراق بڵاو كرایەوە رەشنووسی پڕۆژەیاسای بودجەی گشتی عێراق بۆ ساڵی دارایی 2021 گەیشتووەتە پەرلەمان بەمەبەستی تاوتوێكردنی و دەنگدان لەسەری، بەپێی پڕۆژەكە قەبارەی بودجەكە 93 ترلیۆن و 159 ملیار 954 ملیۆن 484 هەزار دینارە.
هەرێم رۆژانە 250 هەزار بەرمیل نەوت رادەستی كۆمپانیای سۆمۆ دەكات
وەك لە رەشنووسەكەدا هاتووە، نرخی بەرمیلێك نەوت بە 42 دۆلار و قەبارەی هەناردنی رۆژانەی نەوت سێ ملیۆن و 250 هەزار بەرمیلە بە 250 هەزار بەرمیلی نەوتی هەرێمی كوردستان و نرخی دۆلاریش تیایدا بە 1450 دینارە و هەموو داهاتێك بۆ گەنجینەی دەوڵەت دەگەڕێتەوە.
خەرجییەكان بریتییە لە 164 ترلیۆن و 206 ملیار و شەش ملیۆن و 155 هەزار دینارە، لەوانە 120 ترلیۆن و 557 ملیار 692 ملیۆن 591 هەزار دینار وەك بودجەی بەكارخستن و قیستی قەرزی ناوخۆیی و دەرەكی بریتییە لە 14 ترلیۆن 761 ملیار 959 ملیۆن 950 هەزار دینار.
كورتهێنان لە بوجەكە 71 ترلیۆن و 46 ملیار 51 ملیۆن و 671 هەزار دینارە، هەرێمی كوردستان بڕی 250 هەزار بەرمیل نەوتی رۆژانە رادەستی كۆمپانیای سۆمۆ دەكات.
Kurdish