ژووری بازرگانی‌و پیشەسازی سلێمانی پرۆتۆکۆڵی کاری هاوبەشی لەگەڵ ژووری بازرگانی و پیشەسازی هەمەدان واژۆکرد که تایبەتە بە بەهێزکردنی کاری بازرگانی‌و پیشەسازی‌و کشتوکاڵ‌و کردنه‌وه‌ی خولی پیشەی.
سیروان محەمەد، سەرۆکی ژووری بازرگانی و پیشەسازی سلێمانی و یاسین رەحیم فەرەج، جێگری سەرۆکی ژوور ڕۆژی ٢/٢٤ بەئامادەبونی عەلی ئەسخەر زبردست، سەرۆکی ژووری بازرگانی و پیشەسازی ھەمەدان و مەھدی شوشتەری، کۆنسوڵی ئێران لە سلێمانی، پرۆتۆکۆڵی کاری هاوبەش واژۆکرا.
سیروان محه‌مه‌د، سه‌رۆکی ژووری بازرگانی‌و پیشه‌سازی سليمانی ڕایگه‌یاند ”به‌مه‌به‌ستی به‌هێزکردن‌و به‌ره‌وپيش چونی په‌یوه‌ندییه ئابورییه‌کان، پرۆتۆکۆڵێکی کاری هاوبەشمان له‌گه‌ڵ ژووری بازرگانی‌و پیشه‌سازی هه‌مه‌دان واژۆ کرد، که خاڵی زۆر باشی تێدا بۆ خزمه‌تکردنی شاری سلێمانی، هیوادارین بتوانین له ئاینده‌یه‌کی نزیکدا بیخه‌ینه بواری جێبه‌جێکردنه‌وه”.
ئاماژه‌ی به‌وه‌شدا، واژۆ کردنی ئه‌م جۆره پرۆتۆتۆکۆڵانه ده‌بێته‌هۆی گه‌شه‌کردنی ئابووری له شاری سلێمانی و هه‌رێمی کوردستان و ده‌بێته‌هۆی کار ئاسانی کردنی زیاتر بۆ ئه‌و بازرگانان و سه‌رمایه‌دارانه‌ی که کاری بازرگانی له‌گه‌ڵ کۆماری ئیسلامی ئێران ئه‌نجام ده‌ده‌ن.
Kurdish