بەشی كەشناسی لە كشتوكاڵی سلێمانی جەخت لەوە دەكاتەوە، لە سنووری سلێمانی و هەڵەبجە و هەردوو ئیدارە سەربەخۆكانی گەرمیان و راپەڕین، زۆرترین بارانبارینی ئەمساڵ لە قەزای چوارتا و كەمترینیش لە قەزای خانەقین بووە، لە زۆر ناوچەش باران لە ساڵی رابردوو زیاتر باریوە.
كارزان لەتیف لێپرسراوی بەشەكە لە لێدوانێكی رۆژنامەوانیدا وتی، تاوەكو 2ی ئایاری 2022، لە 35 ناوچەی سلێمانی، تەنیا لە سێ ناوچەدا باران كەمتر لە پار باریوە.
ئەوەشی خستووەتەڕوو، ئەمساڵ لە سێ ناوچە زیاتر لە 800 ملیمەتر بارانباریوە، لەكاتێكدا پار سەرووی 800 ملیمەتر باران لە هیچ ناوچەیەك نەباریوە، لە قەزای چوارتا ئەمساڵ 898.5 ملیمەتر باران باریوە، پار 733.5 ملیمەتر بوو.
كارزان لەتیف جەختی لەوەش كردووەتەوە، لە قەزای پێنجوێن ئەمساڵ 878.7 ملیمەتر باران باریوە، پار 686.5 ملیمەتر باریبوو، لە ناوچەی بەرزنجەش ئەمساڵ 822.5 ملیمەتر باران باریوە، پار 763.3 ملیمەتر باریبوو.
Kurdish