پەرلەمانی عێراق، سەرگەرمی پەسەندكردنی پرۆژەیاسایەكە كە دەبێتەهۆی دەستەبەركردنی هەلی كار بۆ ژمارەیەكی زۆر لە دەرچووانی هەردوو كۆلێژی كشتوكاڵ و ڤێتێرنەری.
لیژنەی كشتوكاڵ لە پەرلەمانی عێراق دەڵێت، “سبەی پەرلەمان خوێندنەوەی یەكەم دەكات بۆ پرۆژەیاسای هەمواری یەكەمی یاسای ڕێكخستنی بەكرێدانی زەوییە كشتوكاڵییەكان و تاپۆكردنیان و بەخشینی مافی بەكارهێنانیان بە دەرچووانی كۆلێژی كشتوكاڵ.”
ئەمڕۆ سێشەممە 2ی ئازار، سەلام شمەری سەرۆكی لیژنەی كشتوكاڵ و ئاو و زۆنگاوەكان لە پەرلەمانی عێراق لە ڕاگەیەندراوێكدا ڕایگەیاند، “یاساكە خزمەتێكی زۆر بە دەرچووانی كشتوكاڵ و ڤێتێرنەری دەكات و دەیانكات بە خاوەنی كار و پرۆژەی خۆیان.”
وتیشی، “یاسایەكی تریش هەیە كە خۆتەرخانكردنی ئەندازیارانی كوشتوكاڵی بۆ بواری كشتوكاڵ دەستەبەر دەكات و ئەوەش گرنگییەكی زۆری هەیە، بەوپێیەی خزمەت بە هەزاران دەرچووی كۆلێژی كشتوكاڵ دەكات.”
Kurdish