بە ھۆی مەترسییەکان لە بارەی کەمکردنەوەی خستنەڕووی نەوتی خاو لە بازاڕەکانی جیھاندا، نرخی یەک بەرمیل خاوی برێنت گەیشتە نرخی چوار ساڵی رابردوو و لە سەروو ٨٢ دۆلارەوە مامەڵەی پێوەکرا.
چاوەڕوان دەکرێت لە مانگی داھاتوودا، ئەمریکا گەڕی دووەمی سزاکان تایبەت بە پیشەسازی، نەوت و غاز بەسەر ئێراندا بسەپێنێت، ئەمەش دوای ئەوەی گەڕی یەکەمی سزا ئابوورییەکانی لە شەشی مانگی ئابی رابردوودا بەسەردا سەپاندبوو.
لە کاتژمێر ٠٧:٢٣ نرخی یەک بەرمیل خاوی برێنت لە بازاڕەکاندا بەرزبوونەوەی بەرچاوی تۆمارکرد و بە ٨٢ دۆلار و ٨٨ سەنت مامەڵەی پێوەکرا.
بەرزترین نرخی یەک بەرمیل خاوی برێنت کە لە کۆتایی مانگی تشرینی یەکەمی ساڵی ٢٠١٤ تۆمارکرابوو، ٨٢ دۆلار و ٩٠ سەنت بوو.
بەھەمان شێوە نرخی خاوی ئەمریکی لە بازاڕەکاندا بەرزبووە و بە ٧٩ دۆلار و ٣٩ سەنت مامەڵەی پێوەکرا.
مانگی رابردوو، وڵاتانی ئەندام لە ئۆپێک و بەرھەمھێنەرانی سەربەخۆ لە کۆبوونەوەیەکدا کە لە جەزائر بەڕێوەچوو رایانگەیاندبوو کە نەوتی زیاتر ناخەنە بازاڕاوە.
Kurdish