بانكی نێودەوڵەتی ستایشی بەئەلیكترۆنیكردنی خزمەتگوزارییە بانكییەكانی هەرێم دەكات

ئەمڕۆ سێشەممه‌ وەزیری دارایی حكوومەتی هەرێمی كوردستان چاوی بە شاندێكی بانكی نێودەوڵەتی كەوت، دووپاتی كردەوە كە هاوئاهەنگی لەگەڵ بانكی نێودەوڵەتی دەكەن بۆ بەرەوپێشبردنی زیاتری سیستەمی دارایی و بانكی لە هەرێمی كوردستان.

وەك لە راگەیندراوێكی وەزارەتەكە هاتووە، ئەمڕۆ سێشەم ئاوات جەناب نووری، وەزیری دارایی حكوومەتی هەرێم پێشوازی لە شاندێكی بانكی نێودەوڵەتی لە رۆژهەڵاتی ناوەڕاست و باكوری ئەفریقا كرد، بە سەرۆكایەتی جۆن كریستۆفەر كارێ، بەڕێوەبەری هەرێمی رۆژهەڵاتی ناوەڕاست و باكوری ئەفریقیای بانكی نێودەوڵەتی و شاندی هاوەڵی.

وەزیری دارایی خۆشحاڵی خۆی بە سەردانی شاندەكە دەربڕی و كورتەیەكی لەسەر كار و چالاكییەكانی وەزارەت لە بواری بەدیجیتاڵیكردنی سیستمی بانكەكان و دابەشكردنی مووچەی خانەنشین و فەرمانبەران بە شێوەی ئەلكترۆنی و رێكخستنەوەی سیستمی خەرجی بە شێوازی ئۆنلاین و زیادكردنی شەفافیەت و كەمكردنەوەی رۆتین پێشكەش كرد.

لای خۆیەوە شاندی میوان ستایشی هەنگاوەكانی وەزارەتی دارایی كرد لە بواری شەفافیەت و بەدیجیتاڵكردنی خزمەتگوزارییەكان، داوایان كرد پێوەندی راستەوخۆیان لەگەڵ وەزارەتی دارایی هەبێت بە مەبەستی هاوئاهەنگی و هاوكاری لە بواری پێشكەشكردنی خزمەتگوزاریی بانكی و دارایی و بەرزكردنەوەی توانای ستاف و كارمەندانی وەزارەت لە بوارە جیاجیاكاندا.

لە كۆتایی دیدارەكەدا وەزیری دارایی رای گەیاند كە هەنگاوەكانی دروستكردنی بانكی نیشتمانی، وەك لقێكی بانكی ناوەندی لە هەرێمی كورستان، لە قۆناغی كۆتاییدایە و بە كردنەوەی ئەو بانكە سیستمی بانكی لە هەرێمی كوردستان قۆناغێكی باش دەچێتە پێشەوە، هاوكات ئامادەیی ستافی وەزارەت و هەموو بەڕێوبەرایەتییەكانی دەربڕی بۆ هاوكاری و هاوئاهەنگی بەردەوام لەگەڵ ستافی بانكی نێودەوڵەتی، بۆ كاری پێكەوەیی و زیادبوونی شەفافیەت و بەرەوپێشبردنی سیستمی بانكی و دارایی لە هەرێمی كوردستان.