شارەزایەکی ئابوریی عێراقی، ئاماژەی بە شکستی دانوستانە سێ قۆڵییەکەی نێوان عێراق و تورکیا کرد، بە ئامادەبوونی شاندێکی هەرێمی کوردستان، بۆ دووبارە هەناردەکردنەوەی نەوتی هەرێمی کوردستان لە رێگەی هێڵی کوردستان – تورکیاوە بۆ بەندەری جەیهان.
نەبیل مەرسومی لە روونکردنەوەیەکدا رایگەیاندووە، “ناکۆکییەکان بەهۆی چەند خاڵێکەوە بوون، کە تورکیا ژمارەیەک داواکاریی هەبووە و عێراق رەتیکردووتەوە، لەوانە تورکیا داوای کردووە عێراق قەرەبووی تورکیا بکاتەوە بەهۆی ئەو چەند مانگەی رابردوو کە هەناردەی نەوت راگیراوە لە بەندەری جەیهانەوە، بەڵام عێراق رەتیکردووەتەوە و رایگەیاندووە، راگرتنی هەناردەی نەوت بڕیارێکی نەێودەوڵەتی بووە و عێراق ئەو بڕیارەی نەداوە.
ئاماژەی بەوەشکرد، هەروەها تورکیا داوای کردووە کە عێراق سازش لەو بڕە پارەیە بکات کە دادگای نێودەوڵەتی دایناوە بۆ ئەوەی تورکیا وەک قەرەبووی هەناردەی نەوت بەبێ رەزامەندی عێراق بیدات بەو وڵاتە و بڕەکەشی یەک ملیار و 471 ملیۆن دۆلارە و عێراق ئەو داوایەشی رەتکردووەتەوە.
دەڵێت، “تورکیا گرەو لەسەر پێویستیی عێراق بە پارەی زیاتر دەکات بۆ پڕکردنەوەی کورتهێنانی گەورە لە بودجەی ساڵی 2023دا، بەتایبەتی کە عێراق مانگانە نزیکەی ملیارێک دۆلار زیانی پێدەگات بەهۆی وەستانی هەناردەکردنی نەوت لە رێگەی تورکیاوە، لە بەرامبەردا تورکیاش بە هەمان شێوە پێویستی بە دووبارە هەناردەی نەوتی عێراق هەیە چونکە وەستاندنی ساڵانە نزیکەی دوو ملیار دۆلاری زیانی لێدەدات، تورکیا حەز دەکات ببێتە ڕێڕەوێکی سەلامەت و متمانەپێکراو بۆ بۆرییەکانی نەوت و گاز.
Kurdish