قوباد تاڵەبانی، جێگری سەرۆكی ئەنجومەنی وەزیرانی هەرێمی كوردستان دەڵێت، “پڕۆژە‌یاسای كار”ـمان پەسەندكرد و مافی کرێکاران و کارمەندانی کەرتی تایبەت پارێزراوە.
لە ڕاگەیەندراوێكدا که رۆژی چوارشەممە بڵاویكردووەتەوە، قوباد تاڵەبانی، جێگری سەرۆكی ئەنجومەنی وەزیران ڕایگەیاند، ئەنجومەنی وەزیران پڕۆژە‌یاسای كار-ی پەسەندكرد. یاسایە‌كی گرنگ و سەردەمییانەیە کە ئابوری و بازاڕ و کەرتی تایبەت زیاتر دەبووژێنێتەوە.
جێگری سەرۆكی ئەنجومەنی وەزیران جەختدەكاتەوە كە “لەم یاسایەدا مافی کرێکاران و کارمەندانی کەرتی تایبەت پارێزراوە و یەکسانیی ڕەگەزی لەبەرچاوگیراوە و بەپێی ستانداردی نێودەوڵەتی گرێبەستی کار و کاتەکانی كارکردن و مۆڵەت وەرگرتن، بە تایبەتیش مافی نەوجەوانان و ژنان ڕێکخراوەتەوە”.
لە كۆتایی ڕاگەیەندراوەكەیدا، قوباد تاڵەبانی دەڵێت، “خۆشحاڵم كە ئەنجومەنی وەزیران ئە‌م ئە‌ركە‌ی خستە سە‌رشانی بەندە و تیمێکی وەزاری. لێرەوە سوپاسی ئۆفیسی سەرۆکی حکومەت و هەردوو وەزارەتی کاروباری کۆمەڵایەتی و پلاندانان دەکەم کە هاوکار و پشتیوانمان بوون لە ئامادەکردنی یاساکەدا”.
Kurdish