وەزعی داراییمان ‌

-شتی قۆڕی چی بۆ خاتری خوا!.. كتێبی جان جاك رۆسۆیە.

+ ئەزانم جان جاك تەڕەماشە.. تێی هەڵڵە دەی..

-ئەوە تۆ تەواویت ئوستاز؟!..

+ ئەی خۆ ئیشەڵڵا تێك نەچوم!.. فڕێی دە خێرا.. خۆمان سەدان كەسی لەم موهیمترمان هەیە.

-لەڕۆسۆ موهیمتر؟

+ بەڵێ‌ لەویش‌و لەباوكی ئەویش.. موهیمییەكەی ئەم لەچییایە؟.. ناڵێ‌ باشتر وایە ئینسان بگەڕێتەوە بۆ باوەشی سروشت؟

-با.. بەڵام ئەم سروشتە دوكەڵاوییەی لای تانجەرۆوە نا.. سروشتە پاك‌و تەمیزەكەی جاران.. ئەڵێ‌ با بگەڕێینەوە باوەشی ئەو سروشتە.

+ دە ئێمە قسەی لەوە عەزیمترمان هەیە.

-قسەی لەوەی رۆسۆ عەزیمتر؟

+ هەر قسە نا.. كردەوەش.. لەدوای راپەڕینەوە شوكور گەڕاوینەتەوە بۆ باوەش‌و ناوگەڵ‌و قەڵاندۆشكانی فۆلكلۆر..

-لەچییا مەسەلەن؟.. ئادەی.

+ لەهەموو شتێكا.. بۆنموونە پرۆسەی سیاسییمان كردووە بەیاری حەمامۆكێی مناڵان.

-ئەشهەدوبیللا راست ئەفەرمووی.. ئەمەیان ناتوانم بڵێم وا نییە.

+ ئەی ئیعلامەكەمان؟

-چیمان لێ كردووە؟

+ وتەبێژی حیزبەكان كردوویانە بەشەڕە بەند.

-ئەی نەوت فرۆشتنەكەمان؟

+ كردومانە بەچاوشاركێ. 

– ئەی وەزعی ناوچە دابڕاوەكان؟

+ ئەوە حەی عەلەل صەلات ئاشە بەتەنورەیە.

-رەحمەت لەدینت.. ئەی وەزعی داراییمان؟

+ داراییەكەمان مەعلومە.. رێك وەكو لگاوە.