وەزارەتی سەرچاوەكانی ئاوی عیراق تەئكید دەكاتەوە، ئاوی كۆگاكراوی بەنداوەكانی عیراق تەنها 9 ملیار مەتر سێجایە، ئەوەش لەكاتێكدایە بەنداوەكان توانای گلدانەوەی 96 ملیار مەتر سێجا ئاویان هەیە.
زافر عەبدوڵا راوێژكاری وەزارەتی سەرچاوەكانی ئاوی عیراق رایگەیاند: بەنداوەكانی وڵات توانای گلدانەوەی 96 ملیار مەتر سێجا ئاویان هەیە، بەڵام ئەو ئاوەی ئێستا لەسەرجەم بەنداوەكاندا كۆگاكراوە 9 ملیار مەتر سێجا تێپەڕ ناكات، ئەوەش لەكاتێكدایە ئەم بارانەی چەند رۆژی رابردوو زیاتر لەنیو ملیار مەتر سێجا ئاوی بۆ بەنداوەكان زیادكردووە.
روونیشیكردۆتەوە: ئەو ئاوەی لەبەنداوەكان گل دەدرێتەوە، لەوەرزی هاویندا دەبێتە تاكە سەرچاوەی ئاوی خواردنەوەی پارێزگاكانی ناوەڕاست‌و باشووری عیراق، جگە لەوەش عیراق بۆ كۆگاكردنی ئاو لەبەنداوەكانیدا بەرێژەی لەسەدا 70 پشت بەباراناو دەبەستێت.