رۆژنامەی گاردیانی بەریتانی راپۆرتێكی سەبارەت بە گەشەسەندنی ئابووریی هەرێمی كوردستان بڵاوكردووەتەوەو تێیدا كوالێتی نەوتی هەرێمی كوردستان بە “زۆر بەرز” ناودەبات‌و بە نەوتی كێڵگەی تەقتەق-یش دەڵێ “نەوتی زێڕین”.
رۆژنامەكە نووسیویەتی: “لەكاتێكدا لە بەشەكانی دیكەی عێراق و ناوچەكە بەهۆی شەڕی ناوخۆوە، نائارامی و ئاسۆیەكی نادیار لەبەردەم هاو‌وڵاتیانە، لە هەرێمی كوردستان، كە گۆشەی ستراتیژی جیهانە، سامانی نەوت خەریكە گۆڕانێكی گەورە لەم هەرێمەدا درووستدەكات و سیمای دەگۆڕێت و نوێی دەكاتەوە”.
ئەوەش هاتووە “بە بوونی ٤٥ ملیار بەرمیل یەدەگی نەوت و یەك سەدە غازی سرووشتی، هەرێمی كوردستان رۆڵێكی گرینك لەو بازاڕەی، كە بە قورسی كاریگەری سیاسەتی لەسەرە، دەبینێت”.
تەنیا چەند هەفتەیەك ماوە ئەو بەشە بۆرییەی كە ماوەتەوە لە تەقتەقەوە ببەسترێتەوە بە پێشخاپوور و رێگای هەناردەكردنی راستەوخۆی رۆژانە ٣٠٠ هەزار بەرمیل نەوت بۆ توركیا بكرێتەوە. سەرەڕای ئەمەش، ئامانج ئەوەیە تا ساڵی ٢٠١٥ ، ئەم رێژەیە بكرێتە یەك ملیۆن بەرمیل نەوتی خاو لە رۆژێكدا.
ئەم هێڵە بەبێ رەزامەندی حكوومەتی بەغدا جێبەجێدەكرێت، بەهۆی ئەوەی كە هێشتا رێككەوتنێك لە نێوان هەولێر و بەغدا نەگەیشتووەتە ئەنجام.
رۆژنامەكە نووسیویەتی: “لە راستیدا راكێشانی ئەم هێڵی گواستنەوەی راستەوخۆی نەوتە لە هەرێمی كوردستانەوە بۆ توركیا، كتوپڕ سەربەخۆیی ئابووری و بگرە لەوەش زۆر زیاتر بۆ ئەم نەتەوە گەورەیە دێنێتە ئاراوە، كە هێشتا دەوڵەتێكی سەربەخۆیان نییە”.
لەم بارەیەوە ئاشتی هەورامی بە گاردیان-ی راگەیاندووە: “هاوبەشكردنی سەروەت و سامان یەكەم ئامرازی دەسەڵاتە و بە جێبەجێنەكردنی دەستووری هەمیشەیی عێراق، بەغدا هانی ناسەقامگیری و لێكدابڕان دەدات”.
دەشڵێت: “تەنیا رێگایەك بۆ مانەوەی ئێمە (هەرێمی كوردستان) ئەوەیە كە لە رووی ئابوورییەوە پێشبكەوین، بۆیە تەنیا دروشمی دیموكراسی بەس نییە.”
بەپێی گاردییان، “راكێشانی ئەم هێڵی نەوتە بۆ توركیا، لە ئاكامدا دەسەڵاتی هەرێمی كوردستان زیاتردەكات بۆ سەپاندنی داواكارییەكانی دیكەی وەك: خەرجكردنی مووچەی هێزەكانی پێشمەرگە و قەرەبووكردنەوەی كەسوكاری شەهیدان و ئەنفالكراوان و گەڕاندنەوەی ناوچە كوردستانییەكانی دەرەوەی هەرێم”.
Kurdish