پارەى گەنمى جوتیاران گەیشتە بانکەکانى هەرێمى کوردستان و دواى تەواو بونى رێکارە یاساییەکان دابەش دەکرێت.
لە راگەیەنراوێکدا کە بەناوى وەزارەتى دارایى و ئابورى هەرێمەوە ئاماژە بەوەکراوە؛ ئەمڕۆ چوارشەممە پارەى گەنمى جوتیارانى هەرێمى کوردستان گەیشتە بانکەکانى هەرێم و پاش تەواوبونى رێکارە یاساییەکانى، “بەزوترین کات دەست بە دابەشکردنى دەکرێت”، بەڵام بڕى پارەکەى ئاشکرا نەکردوە.
ئەوە لەکاتێکدایە کە جوتیارانى هەرێم دو ساڵە پارەى گەنمیان وەرنەگرتوە و لەماوەى رابردودا دەیان جار بۆ داواکردنى ئەو مافەیان خۆپیشاندان و گردبونەوەى ناڕەزایەتیان ئەنجامداوە و رەخنەى ئەوەیان لە دەسەڵاتدارانى هەێمیش دەگرت کە؛ “کەمتەرخەم و خەمساردن لە داواکردنى ئەو مافەى جوتیارانى هەرێم لە بەغدا”.
حکومەتی عێراق ٢ تریلیۆن و ٣٣١ ملیار و ٤٤٣ ملیۆن دیناری پارەی گەنمی جووتیارانی لە ساڵانی ٢٠١٤ و ٢٠١٥ لایە، لەو بڕە پارەیەش نزیکەی ٨٠٠ ملیار دیناری پارەی گەنمی جووتیارانی ھەرێمی کوردستانە.