ئاژانسی ڕۆیته‌رز له زاری سه‌رچاوه‌یه‌کی ئاگاداری ڕووسییه‌وه بڵاویکرده‌وه، ڕووسیا به‌رده‌وامه له ئاماده‌کاری بۆ کۆبوونه‌وه‌ی دۆحه که بڕیاره له کۆتایی ئه‌م مانگه‌دا ببه‌سترێت.
ئه‌و سه‌رچاوه‌یه که لێدوانه‌که‌ی له‌لایه‌ن وته‌بێژی وه‌زاره‌تی وزه‌ی ڕووسیاوه پشت ڕاست کرایه‌وه به ڕۆیته‌رزی وتووه: “ئێستا گفتوگۆ ھه‌یه له‌سه‌ر ئه‌وه‌ی چۆن به‌رھه‌مھێنان که‌مبکرێته‌وه و چاودێریی ڕێککه‌وتنه‌که بکرێت. ھه‌روه‌ھا نرخی ٤٥ بۆ ٥٠ دۆلار بۆ ھه‌ر به‌رمیلێک گونجاوه و ھۆکارێک ده‌بێت بۆ ھاوسه‌نگبوونی بازاڕی نه‌وت”.
به‌رھه‌مھێنه‌ره سه‌ره‌کییه‌کانی نه‌وت بڕیاره له ١٧ی نیسان، له دۆحه کۆببنه‌وه بۆ به‌ھێزکردنی ڕێککه‌وتنی سه‌ره‌تایی مانگی شوباتی نێوان ڕووسیا، ڤه‌نزوێلا، قه‌ته‌ر و سعودیه، له‌پێناو دابه‌زانی ئاستی ھه‌نارده‌کردنی نه‌وتی خاو و جڵه‌ودارکردنی زیاده‌ی به‌رھه‌می نه‌وت له بازاڕ.
“ئه‌لیکسانده‌ر نۆڤاک” وه‌زیری وزه‌ی ڕووسیا ڕایگه‌یاندووه ئێرانیش به‌شداریی کۆبوونه‌وه‌ی دۆحه ده‌کات. ئێران که به‌ھۆی سزاکانی سه‌ریه‌وه ماوه‌یه‌کی زۆر به‌رھه‌می نه‌وتی که‌م کرابووه‌وه، ئێستا ده‌یه‌وێ سوود له سووککردنی سزاکانی سه‌ر وڵاته‌که‌ی وه‌ربگرێت و نه‌وتی زیاتر ڕه‌وانه‌ی بازاڕه‌کانی جیھان بکات.
