نرخی تمەن رووی لە دابەزین كردەوە


نرخی تمەن لە بازاڕەكانی ئێران، دیسان رووی لە دابەزین كردەوە و گەیشتە نزمترین ئاست كە لە ماوەی مانگێكدا تۆمار كرابێت.

ماوەی چەند هەفتەیەك بوو نرخی دۆلار لە خوارووی 25 هەزار تمەن دەفرۆشرا، بەڵام لە سەرەتای ئەم هەفتەیەوە 830 تمەنی تری هاتووەتە سەر و ئێستە بە 25 هەزار و 30 تمەن دەفرۆشرێت. هاوكات نرخی یۆرۆش تا 30 هەزار تمەن بەرز بووەوە.

سەرەتای ساڵی رابردوو نرخی هەر دۆلارێك 16 هەزار تمەن بوو، بەڵام لە پایزەكەی گەیشتە 32 هەزار تمەن و دواتر رووی لە دابەزین كردەوە، دوو مانگ لەمەوبەر تا 21 هەزار تمەن دابەزی.

بەگوێرەی رادیۆ فەردا، یەكێك لە گرنگترین هۆكارەكانی دابەزینی نرخی دۆلار لە دوو تا سێ مانگی رابردوو، پێوەندی بە دانوستانە ناوكییەكانی نێوان ئێران و وڵاتانی پێنج كۆ یەك لە لایەك و ئەمەریكا لەلایەكی تر هەبووە.

لە چەند رۆژی رابردوودا ئەگەرەكانی رێككەوتن زۆر لاوازتر بوون و وەزیری دەرەوەی ئەمەریكاش بە ئاشكرا چەند جارێك باسی لەوە كردووە، بۆ رێككەوتن زۆری ماوە و حكوومەتی ئێران ئەو دەسەڵاتەی نییە مل بۆ رێككەوتن شل بكات، بەڵكو دەسەڵاتەكان لە ژێر دەستی عەلی خامنەییدان.

ئێستە كە خەریكی جێگۆڕكێ بە سەرۆك كۆمار و حكوومەت دەكرێت، عەلی خامنەیی رێبەری ئێران لەوانەیە خۆی دۆسیەكە راستەوخۆ سەرپەرشتی بكات، هەرچەندە پێشتریش ناڕاستەوخۆ رۆڵی هەبووە لەوەی رێككەوتنەكە سەر نەگرێت.

لە ئەگەری رێككەوتن نرخی تمەن بەرز دەبێتەوە.


لە ئەگەری رێككەوتن نرخی تمەن بەرز دەبێتەوە. نزیكەی 11 ساڵ لەمەوبەر و بەر لەوەی سزا نێودەوڵەتییەكان بەسەر ئێراندا بسەپێنرێن، نرخی هەر دۆلارێك هەزار تمەن بوو و لەو كاتەوە نرخی دۆلار بەرانبەر بە تمەن 16 هێندە بەرز بووەتەوە.

ئەوەی وایكرد لە ماوەی 10 ساڵی رابردوو نرخی تمەن بە تەواوی روو لە داڕمان بكات، ئەو سزا نێودەوڵەتییانە بوون كە لە لایەن وڵاتانی رۆژئاوا و un بەسەر ئێراندا سەپێنران، ئێران نەیتوانی هاوشێوەی دەیەی سەرەتای سەدەی بیست و یەكەم پەرە بە ئابوورییەكەی بدات. 

لە ساڵی 2015 كاتێك رێككەوتنی ناوكیی نێوان ئێران و وڵاتانی پێنج كۆ یەك واژوو كرا، چاوەڕوانی ئەوە لە ئارادا بوو دووبارە ئابووری ئێران گەشە بكاتەوە و واز لە چالاكییە ناوكییەكانی بهێنێت. ئەم رێككەوتنە راستییەكەی توانی توانای دارایی ئێران بەهێز بكات و بە دەیان ملیار دۆلار لە بودجەی ئێران زیاد بكات، بەڵام كێشەكە لەوەدابوو ئەو زیادبوونەی قەبارە داراییە لە خزمەتی گەشەی ئابووری وڵاتەكە بەكار نەهات و زیاتر بۆ كڕینی چەك و پێداویستی سەربازی و پاشان دەستوەردان لە كاروباری وڵاتانی تری وەك سووریا و عێراق و یەمەن و لبنان و ئەفغانستان، تەنانەت هەندێك وڵاتی ئەفریقیش بەكار هات.

هەمووی ئەو هەنگاوانە هۆكار بوون لەوەی ئەمەریكا لە رێككەوتنەكە نیگەران بێت و لە كۆتاییەكانی ساڵی 2018 بەفەرمی لە رێككەوتنەكە بكشێتەوە و سزای قورس بەسەر ئێراندا بسەپێنێت.

سزاكان بەسەر ئێراندا وایكرد لە كۆتایی ساڵی 2018ەوە تا نزیكەی شەش مانگ زۆر بە خێرایی بەهای تمەنی ئێرانی دابەزێت.


سەپاندنی سزاكان بەسەر ئێراندا وایكرد لە كۆتایی ساڵی 2018ەوە تا نزیكەی شەش مانگ زۆر بە خێرایی بەهای تمەنی ئێرانی دابەزێت. نزیكەی سێ تا چوار هەزار تمەنی ئێران بە یەك دۆلار بوو .

رێنەدان بە فرۆشتنی نەوتی ئێران و بەربەست دروستكردن بۆ سەرجەم چالاكییە دارایی و ئابوورییەكانی ئێران، هۆكاری سەرەكی بوون لەوەی نرخی تمەن بەرانبەر دۆلار روو لە دابەزین بكات. هەموو وڵاتێك بۆ ئەوەی پاڵپشتی لە دراوەكەی بكات، پێویستی بەوە هەیە زۆرترین هەناردەی هەبێت و داهاتی نەپاڵاوتووی نیشتمانیی پێ بەرز بكاتەوە، بەڵام لە ئێران ئەمە رووی نەدا.


PM:09:37:01/07/2021




ئه‌م بابه‌ته 443 جار خوێنراوه‌ته‌وه‌‌